کوالالمپور (نمائندہ خصوصی): ملائیشیا نے سال 2025 کے ابتدائی سات مہینوں میں غیر ملکی سیاحوں کی آمد کے نئے ریکارڈ قائم کیے ہیں۔ سیاحت، فنون اور ثقافت کے وزیر، داتوک سیری ٹیٔیونگ کنگ سنگ کے مطابق، جنوری سے جولائی کے دوران 24.5 ملین غیر ملکی سیاح ملائیشیا پہنچے، جو گزشتہ برس کے اسی عرصے کے مقابلے میں 16.8 فیصد زیادہ ہے۔ پچھلے سال یہ تعداد 21 ملین ریکارڈ کی گئی تھی۔
وزیر نے کہا کہ یہ کامیابی اس بات کا ثبوت ہے کہ حکومت کی جانب سے سیاحت کے فروغ کے لیے کیے گئے اقدامات اور پالیسیز انتہائی مثبت نتائج دے رہی ہیں۔ انہوں نے بتایا کہ وسائل کی کمی اور فنڈز کی محدود دستیابی کے باوجود وزارت نے ایسے منصوبے ترتیب دیے جو نہ صرف عوام بلکہ ملک کی معیشت کے لیے بھی فائدہ مند ثابت ہوئے۔
یہ اعداد و شمار اس وقت سامنے آئے جب مالیزیا کلچرل فیسٹیول کی رنگا رنگ تقریب کوالالمپور کے ٹِتی ونگسا لیک گارڈنز میں منعقد ہوئی۔ اس موقع پر وزیر اعظم داتوک سیری انور ابراہیم، چیف سیکریٹری ٹو دی گورنمنٹ تان سری شمسول عزری ابو بکر اور دیگر اعلیٰ حکام نے شرکت کی۔
وزیر نے کہا کہ ملائیشیا کی ثقافتی تنوع، روایتی ورثہ اور مقامی مہمان نوازی غیر ملکی سیاحوں کو اپنی طرف متوجہ کر رہی ہے۔ انہوں نے زور دیا کہ سیاحتی شعبے کی یہ کامیابیاں ملکی معیشت کو مستحکم کرنے کے ساتھ ساتھ لاکھوں مقامی افراد کے لیے روزگار کے نئے مواقع بھی فراہم کر رہی ہیں۔
ماہرین کے مطابق، سیاحتی آمد میں اس اضافے سے ہوٹل، ریستوران، ٹرانسپورٹ اور چھوٹے کاروباروں کو غیر معمولی فائدہ ہوگا، جبکہ غیر ملکی سرمایہ کاری کو بھی فروغ ملے گا۔
