پورٹ ڈکسن (نمائندہ خصوصی) مجسٹریٹ عدالت پورٹ ڈکسن میں ایک اہم مقدمے کا فیصلہ سنایا گیا جس میں 50 چینی شہریوں اور 2 مقامی افراد کو آن لائن جوا کےالزام میں جرمانے کی سزا دی گئی۔ عدالت نے ملزمان کو ان کے کردار کے مطابق فی کس 3 ہزار سے 6 ہزار رنگٹ تک جرمانے عائد کیے۔
تفصیلات کے مطابق، تمام غیرملکی ملزمان کی عمریں 21 سے 52 برس کے درمیان تھیں۔ ان پر الزام تھا کہ وہ آن لائن جوا کھیلنے کے نام پر عوام کو جھانسہ دے کر رقم بٹورنے کی سرگرمیوں میں ملوث تھے۔ ملزمان نے فردِ جرم عائد ہونے پر عدالت کے سامنے اپنے جرم کا اعتراف کر لیا۔
کارروائی مجسٹریٹ محمد فاریز رحمان کی عدالت میں ہوئی۔ فردِ جرم کو عدالت کے مترجم نے مینڈرین زبان میں ملزمان کو پڑھ کر سنایا، جس کے بعد تمام افراد نے سر جھکا کر قصوروار ہونے کا اعتراف کیا۔
یہ کیس حالیہ دنوں میں مقامی پولیس کی جانب سے چلائی جانے والی خصوصی کارروائی کا حصہ ہے جس میں غیرقانونی جوا اور آن لائن فراڈ کے خلاف سخت اقدامات کیے جا رہے ہیں۔ حکام کے مطابق اس قسم کی کارروائیاں مستقبل میں بھی جاری رہیں گی تاکہ معاشرے کو غیرقانونی سرگرمیوں سے محفوظ رکھا جا سکے۔
